Праваабаронцы за свабодныя выбары

Праваабарончы цэнтр «Вясна» беларускі хельсінкскі камітэт

Інфармацыйнае забеспячэнне рэферэндуму на Брэстчыне кульгае на абедзве нагі

Прадстаўнікі кампаніі "Праваабаронцы за свабодныя выбары" шляхам маніторынгу сайтаў раённых выканаўчых камітэтаў Брэсцкай вобласці прыйшлі да высновы, што большасць з іх, акрамя афіцыйнай інфармацыі аб прызначэнні рэферэндуму па ўнясенні змяненняў і дапаўненняў у Канстытуцыю на 27 лютага, не публікуюць аніякай інфармацыі ўвогуле.

Згодна з Каляндарным планам, ЦВК не пазней чым за тры дні пасля ўтварэння раённых камісій, павінны прайсці іх першыя пасяджэнні.

Аднак апавяшчэнняў пра час і месца правядзення такіх пасяджэнняў няма на сайтах Жабінкаўскага, Ганцавіцкага, Івацэвіцкага, Камянецкага, Кобрынскага, Лунінецкага, Маларыцкага, Пінскага, Пружанскага і Столінскага раённых выканаўчых камітэтаў.

Не знайсці тут і абвестак пра прыём дакументаў па вылучэнні прадстаўнікоў у склад раённых камісій.

А, напрыклад, на сайце Кобрынскага райвыканкама ўвогуле адсутнічае нават банер “Республиканский референдум 2022”.

Больш поўна інфармацыя пра будучы рэферэндум прадстаўлена на сайтах Брэсцкага раённага, Пінскага і Баранавіцкага гарадскіх выканаўчых камітэтаў.

На сайце Баранавіцкага райвыканкама інфармацыя аб першым пасяджэнні камісіі апублікаваная, аднак настолькі выпусташаная, што практычна не нясе аніякай сэнсавай нагрузкі:

“27 студзеня 2022 года адбылося першае пасяджэнне Баранавіцкай раённай камісіі па рэспубліканскім рэферэндуме. На пасяджэнні шляхам адкрытага галасавання абраны кіруючы склад раённай камісіі. Таксама разгледжаны наступныя пытанні:

- аб графіку дзяжурства членаў раённай камісіі;

- аб узгадненні ўтварэння ўчасткаў для галасавання па рэферэндуме.”

Такі ж мінімум інфармацыі публікуюць сайты Ляхавіцкага і Іванаўскага райвыканкамаў.

Уся інфармацыя пра рэферэндум падаецца толькі на рускай мове. Першая дзяржаўная мова – беларуская - нават не прадугледжаная на сайтах тэхнічна.

"Праваабаронцы за свабодныя выбары"