У КДБ пацвердзілі інфармацыю пра затрыманне ўдзельнікаў груп, якія «планавалі зрыў рэферэндуму»
У эфіры праўладнага тэлеканалу АНТ былі паказаныя кадры затрымання, а таксама распавялі пра нейкія ўлёткі, якія нібыта адпраўлялі сябрам выбарчых камісій:
«Настаўнікі! Лічыце галасы на рэферэндуме сумленна. Калі будзе інакш, то бойцеся! Мы да вас прыйдзем і спытаем».
Раней МУС паведаміла аб тым, што ў Беларусі распачалі дзевяць крымінальных справаў, звязаных з правядзеннем рэферэндуму.
Так, начальнік Галоўнага ўпраўлення аховы правапарадку і прафілактыкі міліцыі грамадскай бяспекі МУС Аляксандр Купчэня паведаміў на прэс-канферэнцыі, што у Беларусі распачалі дзевяць крымінальных спраў, звязаных з канстытуцыйным рэферэндумам, прызначаным на 27 лютага.
"Следчымі органамі на гэты момант ужо распачата дзевяць крымінальных спраў, у тым ліку за перашкоду праву на ўдзел у рэферэндуме, незаконныя дзеянне ў дачыненні да інфармацыі аб персанальных звестках, паклёп і псаванне маёмасці", - распавёў Купчэня.
Паводле яго слоў, МУС "фіксуе ўсе звароты ад членаў выбарчых камісій і старшыняў. Зараз зарэгістравана больш за сотні зваротаў. Па кожным з іх будзе праведзена праверка”.